 n 9 yunyu 2024, di tmura n Urupa akken llant, deg yiwen wass, d tafusit akked tafusit-timeṭṭurfit i yufraren (2). D aḍu amaynut !){kind=link}
Ulac tismin gar tmura. Si tafrent n Ugraw n Urupa (1) n 9 yunyu 2024, di tmura n Urupa akken llant, deg yiwen wass, d tafusit akked tafusit-timeṭṭurfit i yufraren (2). D aḍu amaynut !
Maca nusem nekkni, acku d tifranin n tidet, tid deg ur illi usekkak. D ayen deɣren/fernen medden i d-iffɣen si tebwaḍin. Tameddit n 9 yunyu, ulac awal di yal TV neɣ deg yeɣmisen ɣef kra n usekkak d-illan, da neɣ din. Ulac !
Neqqim d iferraǧen, nẓerr amek teteddu tsertit iwatan di tmura n medden, nessaram azekka ad tekcem tmurt n Lezzayer ubdis/luḍa-nni n talwit. Ad ikkes wawal-nni tẓeggin deg iberdan n Lezzayer :
« Vuṭina RCD, xerǧu-na RND ! » (Nevvuṭi RCD, suffɣen-aɣ-d RND !), asmi d-ilul ukabar n RND s… učamar !
Adabu n Lezzayer ur t-kciment tismin acku, i netta, yezwar yakan deg ubrid-nni n tfusit, ur igguni timura n Urupa. Maca, tamuɣli-s akked tikli-nsen di Urupa, mačči yiwet.
Illa umgared d ameqqran :
Timura n Urupa simal snernayent deg-sent ikabaren n tfusit-timeṭṭurfit zun akken nutni ad gen afrag ɣef tmura-nsen, akken ur d-keccmen ugar n iberraniyen, ɣas ugur n yal tamurt mačči d wid d-yusan si berra akken ad xedmen, ad ččen aɣrum-nsen din ; si zik n zik imdanen teddun si tmurt ɣer tayeḍ, ttinigen, yal yiwen ittnadi ɣef wammud-is, issaram ad yaf tumert-is akka neɣ akkin.
Maca amezruy d inigi : yal tasertit ireglen tibbura, tettawi taggara ɣer ukmim/impasse, ittlal-d deg-s wayen ur nelhi (tirit/racisme, fascisme, nazisme, war taneflit…).
Adabu n tmurt n Lezzayer ur yuɣ abrid n tsertit tafusit, tin ur nekkir i yiwen seg iberdan-nni n tfusit : ifren tasertit tadelsant n taârabt-tinneslemt mgal tasertit tazzayrit, mgal aɣref n tmurt ; idda deg ubrid n tdamsa n ‘’import-import’’ mgal tasertit n tneflit ara yesqedcen tussna akked tmussni n tarwa n tmurt ; ikker i tinzin d werhan n trika n ddaw tmurt, akken ad temmečč send ad d-ilal lgil d-iteddun ; irgel tibbura n usirem i yelmeẓyen n tmurt, ldint-asen-d tid n tzegra, d tarewla deg waman n yillel.
Tafrent n tselwit d-iteddun di ctamber 2024, ad teddu diɣ deg ubrid-nni n usekkak.
Ad teddu zun d urar n umezgun, s yilqafen n ‘’ANIE’’ : tamsalt tefra send ad tebdu, iqeffafen (iwtal) ad azzlen, zun illa weḥric-nsen ɣer sdat.
Tamurt ad teqqim di tganit-nni akked layas : « acu teteffzeḍ a Ḥmimi, d llazuq n yilindi », ar asmi ad d-iwwet uḥemmal-nni…
Aumer U Lamara
Timerna / Notes :
1. Parlement européen (Strasbourg, France).
2. Di Fransa, akabar Rassemblement National (ex-Front National n Jean-Marie Le Pen) issaweḍ 32 %, iffeɣ d amezwaru.
Ass-a, llan wid d-ismektan awal-nni n zik : « Eddem tabalizt-ik a Muḥ »… ad tuɣaleḍ ɣer tmurt-ik (Kateb Yacine, Mohamed, prends ta valise, 1972).