Wid yesserɣen tamurt, smeɣren tawaɣit (1), maca ur qqimen di tmerɣiwt-nni n tmurt. Teddun ad sserɣen tutlayt tamaziɣt, ad tt-kksen di tmurt. 

Tidett, irebraben/les terroristes i yesserɣayen mačči deg Illulen Umalu i llan. Llan deg yeɣlifen n tmurt/ministères Lezzayer akked imukan nniḍen n udabu !

Mazal yeḥma yiɣed n times di yal amkan, mazal kkawen idammen n wid yemmuten, aɣlif n uɣerbaz / ministère de l’éducation nationale’’ issuffeɣ-d ulɣu ur igguni yiwen : « tamaziɣt ur tettelmad deg wakud n tɣuri / l’enseignement de la langue tamaziɣt à l’école se fera hors du temps pédagogique ». 

I udabu n tmurt akked iqeddacen-is, tamaziɣt mačči d tutlayt, ad teffeɣ seg uɣerbaz !

Si tmaziɣt ‘’facultatif’’, ddan akkin ɣer userkec n imawlan ur nḥemmel tamaziɣt akken ur tettelmad, tura rnan aḍar ɣer zdat akken ad tt-ssuffɣen seg unnar n uselmed.

Agraw n taârabt-tinneslemt irfed-d aqerru-s, akken ad ikkes ayen i d-wwint tnekriwin n talwit n nnig 40 iseggasen.

Tikli n umaru amatu n uɣlif / secrétaire général du ministère de l’éducation nationale ur temgarad akked wid yessaɣen times i tuddar n At iraten, At Yani akked imukan nniḍen.

D asafu n tmes, d lbumba pyrotechnique yesserɣayen, d LASER infrarouge neɣ d afus yuran ulɣu aneggaru : « tamaziɣt ad teffeɣ seg wakud n uselmed », iswi-is yiwen : ad yeg ccwal akken ad isserɣ tamurt, ad inger usirem n Lezzayer tazzayrit i ssaramen imelyunen n Izzayriyen si tikliwin n furar 2019 akkin.

Ansi i d-tekka tyita ?

Ugut n icenga n tmaziɣt i yellan deg udabu d-isselqem FLN si 1962, maca kra wussan kan segmi rran immal n uselmed n tmurt / commission de l’éducation de l’assemblée nationale gar ifassen n ikabaren n tinneslemt (MSP…), ass-a iban-d ubrid-nsen. 

Teddun, ma zemren, akken ad kksen aẓar n tmaziɣt di tmurt, akken ad skecmen Lezzayer aḍar afus d taqeddact n taârabt-tinneslemt. 

Ṭṭrad n 2000 iseggasen (la guerre de 2000 ans) mazal ad iddu.  

Aumer U Lamara, physicien, écrivain

Timerna / Notes :

1) Tawaɣit akken tella ass-a : nnig 200 yemdanen i yemmuten, rnu wid yerɣan ur ddiren ur mmuten ; imeyyaten n iɣersiwen akked yexxamen, azal n 50 000 ha i tečča tmes, gar uzemmur akked yal aseklu d umadaɣ. Ma d ‘’bilan écologique’’ mazal ur d-iban.