Timenɣiwt n Djamel Bensmaïl : d taɣdemt neɣ d azduz ?

38 n yemdanen iwumi fran s lmut di Lezzayer, gar 94 n yemdanen i d-ṭṭfen ! Amek zemren 38 n yemdanen ad dduklen akken ad nɣen amdan i yellan immut yakan (1) ?

Illa wawal di yal tamurt, « ur ittleqqim yiwen awal deffir tifrat n teɣdemt, akken tebɣu tili » (2).

D ayen illan iteddu di tmura anda taɣdemt tebna ɣef uzref/droit, anda yal tama ad tini awal-is, d ɣerraq neɣ d amastan, syin amezzarfu/le juge ad tt-ifru gar-as d yiman-is, akked wayen illan yura deg udlis.

Tamsalt n tmettant n Djamel Bensmaïl di tzeqqa n temsulta n Larbaâ n At Iraten mačči d tamsalt n teɣdemt kan. Mačči d At Yiraten i yenɣan argaz i d-yusan akken ad issexsi times yeččan tamurt.

D tamsalt n yal win d-ikecmen annar akken ad teḍru txessart ur igguni yiwen.

Ma fell-as ad tefru temsalt, issefk taɣdemt ad d-tessemlil akk wid illan din, am imsulta i t-id-iṭṭfen, i t-ifkan i terkeft, am yemdanen t-inɣan neɣ t-isserɣen deg ubrid, am wid d-igren afus ur issin yiwen. Akken i tferru tesmalt. Mačči d abibbi s lmut i 38 n yemdanen, llan din neɣ ur llin !

Ur izmir ferru n teɣdemt n Lezzayer ad iqqim akken illa ass-a.

Attan temsalt gar ifassen n imastanen ; issefk ad wten akken zemren, s ubrid n uzref, akken ad d-sbinen tixurdas illan di ferru-s, akken ad d-ibin win igan kra, akked win ur ngi acemma, azekka ad d-iffeɣ d ilelli ɣur twacult-is.

Taɣdemt n tmurt n Lezzayer d tagejdit n tmurt, akken daɣ di yal tamurt irnan ccan i wezref. Issefk ad ikkes wawal (yir awal) n ‘’taɣdemt n tilifu’’, anda amezzarfu ad ibedd d agadir ɣef uzref n tmurt, ɣef yiseɣ n tmurt, mačči d afus n uzduz isselfaɣen imdanen.

D asirem ur nengir, am akken d-ldin abrid n talwit yimawlan n Djamal Bensmaïl, d amennuɣ n yal Azzayri akken tamurt ad tebnu ɣef izerfan, akken akk llan izerfan, war tilas.

Aumer U Lamara

Timerna / Notes :

1. Mi tekker tmes tameqqrant n ɣect 2021, imsulta n Larbaâ n At Iraten ṭṭfen-d Djamal Bensmaïl, tezzin yis-di temdint deg ukarrus-nsen, ttberriḥen (?), sbabben-as zun d netta i yessenkaren times. Awal iffeɣ, imir aglaf n yemdanen kecmen tazeqqa n temsulta, nɣan Djamal daxel n tzeqqa (anwa afus i t-inɣan ?), syin imsulta-nni suffɣen-t-id ɣer berra, d agerbuz immuten, fkan-t i weglaf-nni n yemdanen akken ad t-serɣen deg ubrid. Nutni serɣen-t.
2. « On ne commente pas les décisions de justice ».