28 mai 2024
spot_img
AccueilA la uneLǧamaâ n Paris : d GPRA amaynut  ?

Lǧamaâ n Paris : d GPRA amaynut  ?

Isali d-iffɣen, mačči d fake news ! D ayen yuran deg uɣmis TSA (1) (2) : « Les membres de la diaspora algérienne en France peuvent envoyer gratuitement leurs enfants en colonie de vacances en Algérie. Lancée par le président Abdelmadjid Tebboune en 2022, et confiée à la Grande mosquée de Paris… »

D tigawt tamaynut n lǧamaâ n Paris, ass-a teffeɣ seg unnar n ddin, tekcem win n tsertit (s tiddukla Awassir, conseil mondial de la diaspora, conseil de coordination des mosquées (AMMALE)…) ; tekcem diɣ deg unnar-nni deg tella Amicale des Algériens en Europe, tin i yellan d afus n FLN, tesdukel takerḍa n tmurt, taâssast n Izzayriyen s temsulta-s, takriṭ mgal Izzayriyen, tibbandit n yal udem…

Tuttra tamezwarut d assaɣ illan gar udabu n tmurt n Lezzayer akked lǧamaâ yellan di tmanaɣt n tmurt n Fransa : lǧamaâ n Paris d tazeqqa n tmurt n Lezzayer, am akken tella tmahelt/ambassade akked tzeqqa tadelsant tazzayrit (centre culturel algérien-CCA) ?

Mačči d ayen illan. Lǧamaâ n Paris d adabu n Fransa i t-ibnan, s tedrimt n Fransa, s yisem n tiddukla « Société des habous des lieux saints de l’islam », s yisem s selṭan n Merruk, Bey n Tunes akked lmefti n Lezzayer. Tebna gar 1922 d 1926 (teldi tibbura-s ass n 15/07/1926).

Ma adabu n Lezzayer ikcem deg usefrek/gestion n lǧamaâ n Paris (anwa i iyesbedden aselway-is?), llan kraḍ iberdan :

- Advertisement -

1. D tazeqqa n Lezzayer am akken tella tmahelt n Lezzayer akked CCA,

2. Adabu n Lezzayer idwel zun d tazawit/zawiya deg umkan n tiddukla « Société des habous des lieux saints de l’islam ». Anwa asaḍuf i yellan gar Merruk, Lezzayer akked Tunes, i igan tadyant-nni ?

3. tamurt n Lezzayer terẓa tanaya/souveraineté n Fransa, tessekcem iman-is anida ur illi d amkan-is.

Issefk ad aɣ-d-fken (aselway n lǧamaâ n Paris, adabu n Lezzayer, adabu n Fransa…) isalen unṣiben akken ad nẓer ayen illan.

Amezruy n Lǧamaâ n Paris.

Ayen akk yuran ar ass-a, d tiḥila, mačči d ayen illan d tidet.

Mi yebna Lǧama⁻nni di 1926, nnan ibna « akken Fransa ad terr tajmilt i yinselmen i yemmuten di Urupa di ṭṭrad n 1914-1918 ». D awal ucbiḥ, maca d tikerkas.

Ɣas illa wawal si zik ɣef takti i bennu n tamesgida tineslemt di Fransa (ẓer wikipédia), tin ibdan si 1922 mačči deg ubrid-nni.

Lǧamaâ n Paris ibna-t Maréchal Lyautey, win i yellan iḥkem Merruk, s ufus n umeddakel-is architecte ameqqran Maurice Tranchant de Lunel, akked tixurdas deg yessekcem selṭan Moulay Youcef n Merruk (baba-s n Muḥemmed V), irna-d Bey Muḥemmed n Tunes zun d aqeffaf.

Lǧamaâ n Paris ibna s idammen n Irifiyen

Maréchal Lyautey ibna Lgamaâ n Paris akken ad yerr lxir i Moulay Youcef akked tzawitin tinselmin i yekkren ɣer tama n Fransa di tegrawla n Arif.

Mi tekker tegrawla n Arif (s yisem n Muḥend Abdelkrim el Khettabi) (1920-1926), Irifiyen rran akkin tazmert n Spanya, snegren iserdasen-nsen (imenɣi n Anwal), taggara tekcem Fransa deg umennuɣ si 1925, akken ad gen afrag i Yirifiyen ur d-teffɣen seg Arif akken ad ssiɣen timest n tnekra di tmurt n Merruk akken tella, ad suffɣen Spanya akked Fransa.

Spanya akked Fransa dduklen-as i Tagduda n Arif, syen skecmen Moulay Youcef ittberriḥ akken Imerrukiyen ad kcemen deg umennuɣ idis n Fransa (d iḥerkiyen), irna yefka nnig 30000 iserdasen imerrukiyen, akken ad nnaɣen mgal « el ǧuhala n Rrif », akken inna Moulay Youcef s yimi-s.

Lgamaâ n Paris ur illi akken ad tuɣal tejmilt i wid immuten di 1914-1918.

Lǧamaâ d azamul n tixxubta n Lmexzen n selṭan Moulay Youcef akked tzawitin i yefkan imerrukiyen ad mmten d iḥerkiyen mgal atmaten-nsen Irifiyen.

Ass-a, adabu n Lezzayer issefk ad d-ikkes iman-is seg wayen ur nelli d iseɣ, akken ad yerr tajmilt akken nniḍen i tarwa n tmurt-nneɣ, Tamazɣa tameqqrant, ad yeǧǧ tamesgida d amkan n ddin, mačči d win n tkerkas n tsertit, akken tebɣu tili.

Ur telli d tallit n GPRA amaynut di ddra n temsizzelt di tifranin, akken tebɣu tili. 

D awezɣi ad d-yas wayen ilhan deg usderdef di sin iberdan ur neddukel, win n tsertit n iɣarimen/citoyens akked win ddin, n yal yiwen i yiman-is.

Anwa i d-innan deg iseggasen n 1930 : « Anida yella ddin, tella takerḍa » / « Win kayen eddin, kayen lexyana » ? (Nnan d Messali Hadj, di tallit-nni n PPA ?).

Aumer U Lamara

Timerna/Notes :

1. Aḍris n TSA :

Les membres de la diaspora algérienne en France peuvent envoyer gratuitement leurs enfants en colonie de vacances en Algérie. Lancée par le président Abdelmadjid Tebboune en 2022, et confiée à la Grande mosquée de Paris, l’initiative rencontre un certain succès auprès de la communauté algérienne en France et dans d’autres pays européens. (06/05/2024).

2. Tadiwennit n Chems-Eddine Hafiz (Lǧamaâ n Paris) :

1 COMMENTAIRE

  1. Skud medden mazal tzallan di timesgida issedsaw udabu, kerrfen tagecrirt deffir amghar – limam ittxellis udabu, awer tefrari tafat fellasen.
    Yak ulac win id-ten-iqqnen; yak zemren ad zallen deg wexxam, deg ulawen-nsen, deg lexla, … acimi ar taken tamezzught i les finctionnaires n udabu ?
    Awer kkren !

LAISSEZ UN COMMENTAIRE

S'il vous plaît entrez votre commentaire!
S'il vous plaît entrez votre nom ici

ARTICLES SIMILAIRES

Les plus lus

Les derniers articles

Commentaires récents