Adabu n tmurt n Lezzayer ur ilemmed seg umezruy. D tawaɣit n yiḍelli, d tin n wass-a, d tin n uzekka ; teqqim tmurt di tikli n timendeffirt.
D isali d-iffɣen di tmurt n Lezzayer (1) : « adabu n Lezzayer ifka tazeqqa i ukabar aɣelnaw arifi (Parti national rifain (PNR)) ». Tazeqqa n tagensest/représentation tella deg uzqaq/tazribt Cheikh Bachir El Ibrahimi (2), di Lezzayer tamanaɣt.
Zun ulac tizeɣwa nniḍen n udabu di temdint n Lezzayer !
War ma nekcem di tasleṭ tasertant (analyse politique), asezdeɣ n ukabar PNR di tezribt n Bachir El Ibrahimi, d azamul ameqqran n tikli n udabu n Lezzayer : ad iwwet akken ad iqqen akabar PNR deg uqaleb n taârabt-tnneslemt, akken azekka ad idwel d akabar n « République arabe rifaine démocratique (RARD) ».
Adabu n Lezzayer ad iwwet ad issentu tagest tis snat n taârabt-tinneslemt deg wakal n Tamazɣa, am tin i tga tyuga « El Gueddafi-Boumediène » di 1973, mi d-slulen RASD (République arabe sahraoui démocratique), di tnemmast n Tamazɣa.
Nnig unbac illan gar Lezzayer akked Merruk ɣef temsalt n RASD, d taḥilet tamaynut n Lezzayer akken ad terr tiyita i tḥilet tamezwarut n Merruk, win igan tallalt i ukabar n MAK, tin issawḍen tamsalt ɣer ugraw n ONU (anda aneɣlaf n Merruk, M. Bourita, issuter timunent n la Kabylie).
Tamsalt tban am uzal : adabu n Merrruk ur iri ad d-tlal tmurt tamunant, ‘’la République Kabyle’’, di tmurt n Lezzayer ; adabu n Lezzayer ur iri ad d-tlal tmurt tamunant, « la République du Rif », di Merruk. Acku i sin d icenga n timanit n iɣerfan.
Si tal tama d tiḥila kan, am tid n zik : « ayen ufiɣ ad wteɣ yis ».
Tamsirt si tsertit n wa akked win :
Tamezwarut d tamenzayt/principe : akabar n PNR akked ukabar n MAK, neɣ wiyaḍ, d azref-nsen ad ilin di tmurt-nsen (Rabat, Lezzayer, Tunes…) ma ddan deg ubrid n tugdut kan, ma ur kcimen deg unnar n takriṭ/violence, n tirit/racisme, neɣ n timeṭṭurfit tineslemt.
D azref-nsen ad seddun tasertit-nsen di talwit. D tafrent n war asekkak i d taɣdemt ara ten-isbedden, neɣ ad ten-isseɣlin. Llan ikabaren ‘’indépendantistes’’ di tmura nniḍen, mačči d ayen d-innulfan di tmura n Tamazɣa.
Tamsirt tis snat : tabburt n tsertit n Merruk, Lezzayer, Tunes… mačči d beṭṭu d tiḥedrin n yal tamnaṭ, « am ibawen ɣef lluḥ », zun yal yiwet ad tefru uguren i yiman-is. Winna d abrid ireglen (impasse politique).
Abrid iddren d win ara yesduklen timnaḍin akken llant, di bennu n usenfar i tmurt tameqqrant tamagdayt, s yal udem n tmetti yellan deg-s, anda ara kksent tlisa n tmara yellan ass-a gar Merruk, Lezzayer, Tunes, Libya…
Tasarut-is d tadukli n iɣerfan n Tamazɣa akken ad ikkes ‘’buberrak’’ n taârabt-tinneslemt, ad d-teffeɣ tmurt seg uḥdun n ‘’waɣlan aârab’’, ad iqqim ddin ineslem d ddin kan, mačči d amezrag n tekriṭ gar iɣerfan, gar yemdanen.
D win kan i d abrid iddren.
Aumer U Lamara
Timerna/Notes :
RARD : « République arabe rifaine démocratique ».
1. Le Matin d’Algérie : le parti national rifain ouvre un bureau à Alger : https://lematindalgerie.com/le-parti-national-rifain-autorise-en-algerie/
2. Bachir el Ibrahimi (d baba-s n Ahmed Taleb Ibrahimi), ibedd d aselway n ‘’el ɛulama’’ di 1940, deffir Ben Badis. PPA issuffeɣ-it akkin ɣer Maser, FLN irra-t ɣer lḥebs di Lqahira acku illa yessexdam inelmaden izzayriyen deg ubrid n timeṭṭurfit tineslemt.
D netta i tqerreḥ tutlayt tamaziɣt/taqbaylit deg yimeẓẓuɣen !
