Tiẓrigin Koukou (1) tbedd ass-a d tagejdit n tmussni di tmurt n Lezzayer, di tallit deg tamussni teteffeɣ annar deg wass ɣer wayeḍ, zun d asyax n nnger.
Ilmend ad as-yefk tallalt udabu n tmurt n Lezzayer, akken ad tennerni ugar, netta yal ass isnulfu-yas-d uguren : d tukksa n umkan di SILA, d tukksa n umkan di tmesriyin n udlis akkin akka, d anerfud ɣer tzeqqa n temsulta/commissariat n imeɣriyen i d-tenced akken ad slen i umyaru d-iwwin amaynut… mačči d yiwet !
Ass-a, adabu iwwet ad ikkes Tiẓrigin Koukou akken ur tettiki di tmesrit n udlis n At Wasif, ara yilin di tazwara n tuber d-iteddun. Alɣu d-ifka uselway-is, Arezki Aït Larbi, inna-d ayen illan, ur iǧǧi ugzir (2).
Tuttra tamezwarut :
Ma teffeɣ abrid tezdit/société « Tiẓrigin Koukou », tella teɣdemt/justice n tmurt ad as-teg talast ; llan iberdan n teɣdemt akken ad tt-ifru umezzarfu di tzeqqa n teɣdemt. Ma tessuffeɣ-d adlis i yeffɣen i ubrid n uzref, tella diɣ teɣdemt ad tegdel adlis-nni. D tikli yellan di yal tamurt n tugdut ibedden ɣef uzref ?
Maca, ayen i nẓerr di temsalt-a, ittban-d zun d taɣennant n wid illan ffren deg udabu, akken kan ad hudden ayen illan ibedd, isnernay di tmussni di tmurt n Lezzayer.
Tuttra tis snat :
Anwa afus i d-ikkaten si deffir teɣmert, zun d « sniper », s yisem n tmurt n Lezzayer ?
Ur nessiɣzif awal ugar : nnig 60 iseggasen deffir tlalit tamaynut n tmurt n Lezzayer, deffir 70 iseggasen si tnekra tameqqrant n 1954 i d-iwwin tukksa n tbarda/tarekt n temhersa n Fransa, nenwa neffeɣ-d seg wanzel n ukulun akked imilisen d-innulfan di 1962. Tidett n wayen i nẓerr ass-a, mazal i frant temsal timeqqranin.
Tella yiwet tban :
Afus i yekkaten imussnawen n yal annar, imyura, imedyazen, inaẓuren akked wid akk isnernayen, s yisem n tmurt n Lezzayer, tidet ikkat tamurt n Lezzayer.
Issefk ad d-tesfi timmist yiwen wass, ad ikkes wanzel akked uzaglu n uqeẓẓul, n tdebbuzin, akken ad bedden izerfan i yal Azzayri, anida yebɣu yili di tmurt n Lezzayer.
Issefk tadbelt/administration n tmurt n Lezzayer ad tekkes wid ikecmen deg-s zun d tawekka, akken kan ad seddun tasertit tacengut n tmurt n Lezzayer, akken taggara ad snejlin Izzayriyen, ad hudden tamurt n Lezzayer wakali.
Ass-a, issefk yal Azzayri ad t-yaweḍ nnif, ur iqebbel ifergan d-ibedden akken ur tettnerni tmussni. D tiddi-nni kan ara d-issuffɣen tamurt si tillas, anda yal amyaru, yal amsiẓreg/éditeur, am « Teẓigin Koukou », ad d-iger afus i bennu n ugadir ameqqran n yidles n tmurt.
Taggara, abrid n tidet iban, ad ikkes ugzir : adabu ad ildi tabburt n Tmesrit n udlis n At Wasif akked yal timlilit i Teẓrigin Koukou.
Tamurt n Lezzayer n warraw-is, mačči n « les snipers » iddurin tibbura, iteddun d imenzan/mercenaires n tmura nniḍen, mgal tamurt-nsen.
Aumer U Lamara
Timerna / Notes :
1. Les éditions Koukou, aselway-is d Arezki Aït Larbi, di Lezzayer tamanaɣt.
2. Alɣu n Teẓrigin Koukou n 29/09/2024 : https://lematindalgerie.com/salon-du-livre-dath-ouacifs-koukou-editions-denonce-le-chantage-de-tidjani-tama/#goog_rewarded
 tbedd ass-a d tagejdit n tmussni di tmurt n Lezzayer, di tallit deg tamussni teteffeɣ annar deg wass ɣer wayeḍ, zun d asyax n nnger.){kind=link}