24 février 2024
spot_img
AccueilA la uneTahar Djaout : anza n Wulxu

Tahar Djaout : anza n Wulxu

Tahar Djaout

Gren-k-id ger wallen-nsen. Usmen deg-k yemcumen, ulac amkan ideg ur llin. Ɛedmen-k ɛedmen-aɣ. nɣan-k di tefsut! Amek akken, tafsut ar Leqbayel tettmagaraɣ-d s idammen!  Usmen deg-k iseṭṭafen, s yemru teṭṭfeḍ-asen-d asawen, terriḍ-asen tadimt.

Kra turiḍ yufrar, kra i d tenniḍ yewzen, d imal n tsuta, d imal n wegdud. Imeɣriyen akken kan bdan ttissinen d acu-k, ẓran abrid-ik yessuffuɣ, tiktiwin-ik d tafat. Wid ur neɣri, yebda yettawḍ-iten-d wawal yelhan, usefru yessakayen, uwelleh yessufuɣen. Ufan-d deg-k ayen i d yewwi Mɛemri d Ferɛun, Iɛemrucen… At wawal gren-ak irebbi, zuxxen yes-k. Kečč tefkiḍ-asen udem anda ilaq.

Lemmer mazal-ik, tili yerna ccan-ik, ad d tifrireḍ ugar, tiktiwin-ik ad ẓẓunt deg tmetti-nneɣ, deg umaḍal. Idles d tɣerma taqbaylit, tamaziɣt ad nadin timura s tsekla-k. A ɣ-awin d lemtel, a s-inin “xlant ɛecra yeḥya-tt-id yiwen”. Ad nnulfun yemnuda n iɣessan di yal tamurt, ad nadin ɣef igrawliwen, ad skeflen iḥeqqiyen.

Txusseḍ-aɣ i merra. I lemmer telliḍ, ugaɣ wid iwumi i d iṣaḥ wawal ass-a, ahat ad kukrun, yezmer ad rren aḍar, ur ɣ-ttarran ara d ulac, amzun nenger nekni nella!  Ur ɣ-ttaran ara d Icerqiyen, am wakken i d aɣ-d ttawin deg wawal yal ass: “am nekni am nutni, d leqrun aya i nesdukkel usawen, ihi ass-a am yiwen neɣ d yiwen, lqebla yiwet.

- Advertisement -

Ur ɣ-ttarran d Iɣerbiyen, a k-qqaren: s kra nesɛa yekka-d seg Irumyen, s leḥyat-nsen neǧren-aɣ-d abrid n tmusni d tira, i nekni tezdeɣ timawit, yak ur d iteffeɣ wejgu deg umegraman!” Ihi ay amedyaz, tamettant-ik tesgujel-aɣ, nettemruruḍ, ulac win i d yeslan i teɣri-nneƔ!

Ulac anwa ara yessiwḍen awal-nneɣ: “Waaa d Leqbayel, d Imaziɣen, ur nelli ur nettili d Icerqiyen neɣ d Iɣerbiyen. Nekni d agdud ger yegduden, d idles ger idelsan, yewwi-d yefka i wiyaḍ. Nesɛa taɣerma, tennerna s tid i ɣ-d yezzin, neẓra terna i tiyaḍ, anda nxus a t-nseggem, anda yelha a t-nesnerni. Xḍut-aɣ nebɣa a neqqim d nekni mbla takna mbla iken”.

Ɛeddan tesɛa u ɛecrin iseggasen-aya, nettraju timital-ik. Ɣas llan gedlen-ten ! Wissen ar melmi! Iɛdawen n tsekla, n tmedyazt, d tẓuri s umata ṭṭfen amkan, anda tella tafat rran-tt d ṭṭlam, likul ara-d yerren asirem ṭṭfen-as imegran.

Lemmer ad teẓreḍ i yeḍran, aseggas yezrin yif win i d iteddun. Tesɛa u ɛecrin iseggasen-aya ur d nufi ɣef wacu ara neddakel, yal tikkelt ara d-nebdu kra ad azzlen yemcumen-ik/nneɣ a ɣ-sluɣen tala, si 62 ar ass-a ntess-iten d iluɣanen. Thennaḍ kečč yestaɛfan. Ma tkemmel akka ur yettɛeṭṭil ara wegdud ɣef turiḍ, tennuɣeḍ, i triḍ ad yif wiyiḍ  ad yernu ar ɣur-k. Kra n iseggasen neɣ n leqrun ad d asen imnuda n yeɣsan ad nadin fell-aɣ, ad zwiren seg taddart n Ulxu. A ɣ-ɣren, ad awin fell-aɣ timucuha am wakken i tent-id wwin mi nedder, ahat tikkelt-a mi nenger ad inin tidet yellan. Yiwen ur yeẓri azekka.

Farid Benmokhtar

Aselmad asdawan.

 

LAISSEZ UN COMMENTAIRE

S'il vous plaît entrez votre commentaire!
S'il vous plaît entrez votre nom ici