16 juin 2024
spot_img
AccueilPolitiqueFLN akked yerbiben-is, dduklen akken ad bnun « front intérieur » !

FLN akked yerbiben-is, dduklen akken ad bnun « front intérieur » !

Awal ifra : « FLN, RND, Elbina, Elmousteqbel, dduklen akken ad bnun admer ilmend n tafrent d-iteddun… ».

Awal ur d-nnin deg ulɣu-nsen : mgal anwa ara dduklen, akken ad nnaɣen  ?

war ma « nerra awren ɣer tessirt », tadukli-nsen d tin illan si zik n zik mgal aɣref azzayri, ɣas tbeddel udem neɣ isem akk’akka : d agraw akken ad ibedd, ad irnu ad irekkel udabu d-ikecmen si 1962.

D admer-nni (front-nni) i d-ikecmen si berra, s wudem n « armée de l’extérieur », i yuɣen tasga, tura sbedden « front de l’intérieur », akken ad ččen tamurt, ur asen-d-ikeccem yiwen.

Ad rnun ad skecmen tawekka di tgejda n umezruy (« primauté de l’intérieur sur l’extérieur/izwar udabu n ugensu, win n berra », i yuran deg uswir n Soummam). Ur telli tsuddest nniḍen.

- Advertisement -

Timura teddunt ɣer sdat, tamurt n Lezzayer teteddu ɣer deffir.

Di tallit-nni deg FLN iqbel, s tḥila, akken ad yili umur n Izzayriyen ur nelli ddaw uḍar-is, isnulfa-d « Parti du front de libération nationale », tikli-s teqqim deg ubrid, ur tessaweḍ. Kateb Yacine inna-t deg wawal-is : « si le FLN est une partie de quelque chose… c’est quoi ce quelque chose ? ».

Awal n Kateb iqqim ur ifri : ‘’quelque chose’’-nni, d tamurt n Lezzayer, d aɣref azzayri s timmad-is !    

Deffir nnig 60 iseggasen n udabu n FLN i yerran takmamt i tmurt, ass-a zun uysen yemdanen, snulfan-d awalen itekksen asirem, am win iwten iman-is s yiman-is (auto-flagellation). Anwa ur nesli :

– « ur tettbeddil ara » ! Zun d ayen yuran di ‘’twenza n tmurt’’, mačči d imdanen i tt-ittbeddilen.

Si tama nniḍen, d ‘’awalen igezzmen awal’’, wid igeddlen asegzi/axemmem. Di tutlayt n darǧa ass-a, innulfa-d wawal zun d timqessin :   ‘’Mɛa el exxer !’’ (‘’taggara !’’, ‘’abrège’’, awal n taggara), akken ad gezmen awal i yal win iteddun ad d-ibnu awal-is si tazwara, ad d-issu i wawal si tazwara, akken ad yaweḍ ɣer uẓar n tagut.

Zun Izzayriyen kksen-as akud i weḥric n tesnegzimt/réflexion, issefk-asen ad awḍen srid ɣer tareẓmit/solution ; tga-yasen am tsertit n tallit-nni n « usine clés en main », « produits en main ».

Inna-yas yiwen akken nniḍen : « naâya di les analyses/tislaḍ, efket-aɣ-d La solution/tareẓmi !». 

Maca, am akken ur iwata parti unique, ur telli yiwet treẓmi (solution unique), ɣas illa wanda d-innulfa deg umaḍal ubrid-nni n « one best way » (yiwen ubrid yufraren), taggara iban-d d tikerkas. Di yal tamsalt, iberdan mačči yiwen i yellan. 

Tafrent taselwit/élection présidentielle

Ma neẓra dduklen ass-a ikabaren n FLN, RND akked yerbiben nniḍen, ttberriḥen, mačci akken ad azzlen di temsizzelt am akken tettili deg umaḍal amagday. Akken llan ẓran mačči d tafrent, d abrid n usekkak akken kan ad gren afus di twizi… i wučči n ‘’ucebbaḍ n tmellalin’’.

Wid iṭṭfen anzel akked tsura n udabu, fersen-asen-d abrid yakan : deg yiwet tama snulfan-d ikabaren n ‘’Buǧlima’’ (Bu yigelman), kkaten abendir s yisem n tinneslemt, di tama nniḍen snulfan-d acengu amaynut n ‘’indépendantistes – terroristes’’, serkacen-asen taɣdemt akked leḥbas yal ass akken ad smentigen times s tirac n iseggasen n unekraf.

Ma d aḥric n ikabaren imagdayen (RCD, FFS, PST, …), gren-asen yal tawekka akken yal yiwen ur iddukul akked wayeḍ, sḥerkilen yal yiwen di tama-s, akken ad azzlen di tafrent taselwit… anida ur illi yisem n temsizzelt, teddez tebrez yakan.

Azekka tezmer ad d-tili tafrent iwatan, ad ibedd uselway n tidet akked udabu n tidet, ma nga-yas azal i tafrent-nni s tikli n « yal azzayri s tiɣri-s », « un Homme, une voix » am awal-nni yenna Mandela, win ibeddlen udem i tmurt-is. Di tallit-nni, nnan « awal-is d awezɣi », ‘’c’est de l’impossible !’’. 

Ass-nni, nezmer ad nini : « Awal aneggaru ! (mɛa el exxer !) ».

Aumer U Lamara

1 COMMENTAIRE

LAISSEZ UN COMMENTAIRE

S'il vous plaît entrez votre commentaire!
S'il vous plaît entrez votre nom ici

ARTICLES SIMILAIRES

Les plus lus

Les derniers articles

Commentaires récents