Ɛawedeɣ-as taɣuṛi i wedlis n Rachid Oulbsir i d-yura ɣef Si Muḥend Umḥend, uffiɣ ddeqs n isefra i d-yebbwi ur t n-id bbwin ara wid akk i d-yuran ar ass-a ɣef Si Muḥ.
D isefra i d-yeţţmeslayen ɣef tmmnaṭ n la Summam. Deg-sen ddeqs εnan Lεaṛc Nat Mlikec, d Warggaz ameqqran i g-reffden isem n Lεarc-is : wagi d Si Muḥend Saεid Amlikec. Di teswiεt-nni, yella d amdyaz u daɣen d amgara (Guerrier). Yella deg imgarayen imezwura iquvlen anevaz ( envahisseur) aṛumi, dɣa amenuɣ ameqqṛan i d-yeḍaran deg Ccaṛiḍen. Am-akken diɣ yella di tnekra n 1871. Si Muḥend Umḥend d Si Muḥend Saεid Amlikec mmyizzgand nezeh. Ɣef wannect-a i ṭuqqt-ent tikliwin n Si Muḥend ar tmmnat Nat Mlikec.
Ihi, a d-vḍuɣ yid-wen kra n isefra i d-yesekfel Racid Ulebsir.
Ɛeddaɣ Tassargant ḥafi
Tamurt lmenfi
Jbiɣ-d Iɣil n Talalt
Tiɣbiṛt d luḍa rrifi
Abexsis yerfi
Tagma d assif n tuzalt
Muḥend Saεid anifi
Amlikec ṣafi
Imuger-iyi-d s tanalt.
Timzeggiwin (séjours) n umedyaz di temmnaṭ Nat Mlikec, andda ţţḍegif-en amesevrid i wumi ţakken laεnaya ɣas ad yili d amenɣay (criminel), akken yella di laεwayed n wedrar n Jaṛjjaṛ, ţilint-as tiggwnatin i temliliyin akk d iqqara n igen (armée) Nat Mlikec i g-ddren i tmeţţant n Bubɣla. Imenẓaḍen (commandants) Ali At Wdiε d Aḥmed Uṣula, llan d immddukel n umedyaz! Ţemmlilin-d ar Muḥend Saεid i g-llan d amaray amatu n igen ixessṛ-en, i g-sleɣmen (dissoute) zat n lεeṣkker n général Camou di 1864.
Tassargant legfa tewεaṛ
Astaεfu ɣer Aεmaṛ
Lembat ɣer Ḥmed Uṣula
Franṣa tjered-aɣ nngar
Alleh a ţ-neqqhaṛ
Ṛṣas tagmaţ d lεula
Si Ɛevlekrim awaεmaṛ
Ṛzana d leqqddar
Iǧa-d tara d slala
Yiwen wass, Si Muḥ yebbweḍ deg-iḍ ar Yiɣil Leqṛaṛ, ţaddart i d-yezgan deg-wunẓul Nat Mlikec, imezzdaɣen-is ɣil-ent d amezenzi (marchand) n leḥruz, dɣa Areẓqi Uḥarmiḍ lamin n taddart d ṭeman-is ẓẓεent-id. Di tlemast n yiḍ, yuli ar taddart n Lemṣela, andda yesεa amddakkel-is fi yeţţkel, iffuk iḍ ar ɣur-s s uqqessar d isefra.
Aqli deg Iɣil Leqṛar
Swen-iyi lemṛar
Tarbaεt Uṛeẓqi Uḥarmiḍ
Nnsiɣ taεebbuṭ i ccaṛ
Ussu inu d asɣaṛ
Igguma a d-iffak yiḍ
Lemṣela Tala lεinṣaṛ
Ɣer Umlikec lḥaṛ
Talava-s tekkes aṣeemmiḍ.
Yal m-ara yεeddi deg At Mlikec, Si Muḥ yeţţẓuṛu-d Sidi Lmufeq. Yiwet n tikkelt yeṭṭf-it wedfel deg-wuvrid. S yiwen usefru iεenna ar Lmufeq v-ummzur aɣwezfan. Yeẓṛa ţikkelt tannegarut, i t-id iẓuṛ, dɣa yesuter deg-s tuṣṣṛa (yella deg-wawal : Lmufeq i teddun d yeɣriven).
S Wanuz tiṭṭ tbaṛeq
A Sidi Lmufeq
Buɣeɣub yeddal tuyat
Aţa tassa-w tceqqeq
M-irad lfiṛaq
Nnsiɣ i wedfel yekat
Abrid-a nevɣa a nncaṛeq
Tacḍaṭ t-zenneq
Laεnaya-k i weɣriv ţafat.
Ahmed Aït Bachir
Tanemirt ghef rriha n teqvaylit n zik